السلام عليكم
طبعا التوبيك بـآين من عنوانه
عشان مطولش لان الجمل كتيره لوحدها
فندخل فى الجمل على طول .._>
* ربنا يرزقك بعيل اهبل يوريك اللي ورتهوني .
* جتها نيلة الى عايزة خلف تيجى تتفرج .
* اقفل زراير القميص ماتبقاش عامل زي العيال الصيع.
* امشى جاتك مشش فى ركبك.
* هات كيس عيش وانت راجع.
* رحلة ايه ان شاء الله, على أيامنا ماكوناش بنتطلع زفت رحلات .
*أوعا حد يضحك عليك ويقولك جرب السيجارة دي.
* ايه الا مبالاه و الاستهتار اللي انت عايش فيهم دول .
*شوف ياد انتا لو متعدلتش انا هطلق امك بسببك.
*يادى الكمبيوتر اللى انت قاعد عليه ليل نهار.
* قومى يااختى امسحى الشقه ولا انشرى معايا هو ده غسيل امى.
*يكون فى علمك كليه الهندسه صعبه .. ومحتاجه مذاكره
*هو دا اللى انتا فالح فيه
* قوم اقرا لك كلمتين ينفعوك .
* وطي المدعوق ده شويه .
* انت فاكرنا نايمين على ودانا ؟
* بلاش أكل بره .
*ياريتك تحفظ دروسك زى مانت حافظ الاغانى.
* عيـــب ... لازم تحترم اللي أكبر منك .
* لو شفت خناقه مالكش دعوة بيها .
* كريم دا عيل بايظ وماتمشيش معاه تاني .
* مين منى دي انت كل يوم تصاحبي واحدة جديدة ؟.
* انته مبتكلش جزر ليه .. اجيبلك برتقانه. طب كل سلطه .
* يبني بأسلوبك ده مش هتعيش معاك واحده .
* قومي ساعدي امك ده اللي هيتجوزك أمه داعية عليه.
* اوعى حد غريب يديلك حاجه تاكلها و تشربها و تاخدها منه .
* يا ابني حرام عليك الى بتعمله فينا ده.
* انا سايبالكوا البيت وماشية ومش حتشوفوا وشي تاني .
* ما تعليش صوتك .
* وانت فاكر احنا مستنيين منك حاجه .
* المسلسل مش هينفعك ...قوم .
* متفتحش الباب لحد و انت لوحدك و متدلدلش راسك من شباك العربيه .
* كفايه رغي في التليفونات .
* كل على مهلك .. وامضغ كويس ... وما تكلش وانت واقف .. وكل من قدامك ما تحفش .
* اطفي التلفزيون وقوم ذاكر ولا و خش اوضتك .
* ربنا يهديك ربنا يهديك ... وساعات يتقال .. انك لا تهدي من أحببت .
* صليت العصر ؟!
* بلاش تمشى حافى البس شبشب وانته داخل الحمام .
* ما فيش مذاكرة على المزيكا .. وازاى بتذاكر و البتاع ده شغال جنبك .
* افرد ظهرك .
* لم شراباتك.
* ماتكلش فى ضوفرك.
* كنت فين لحد دلوقتى يا صايع.
* ماتتأخرش علشان عندك كلية بكرة بدرى.
* انا مش عارف انته طالع لمين.
* انا : ياماما بقه ايه ده ؟؟؟
ماما:مووو لمـا يــــــخدك .
* ده منظر او ده بني آدم ، انت عايش فيها ازاي؟.
* هو انا الخدامه الى ابوكم جبهلكم .
* الى يطلع من الاوضه يطفى النور وراه .
*أبوك عندك أهو اتصرف معاه .
* اللي بيشيل قربه مخرومة بتخر عليه لوحده ..
* لو مش فاهم حاجه ارفع ايدك و قول للأستاذ مش فاهم .. متتكسفش .
* البس فنله قطن تحت ودفي سدرك ودخل التيشرت في بنطلون البيجامه وانته نايم .
* يأبنى المذاكره مابتخلص .... نفسى اشوفك مره ماسك كتاب.
* اعمل حسابك مش حندخلك جامعه خاصه.
* قالب ليلك نهارك طول الليل صاحى وطول النهار نايم
طبعاً ما حضرتش ولا محاضرة ولا سكشن , وطول اليوم صايع بره البيت .
* مالكش دعوة بالسياسة .. وماتمشيش في مظاهرات .
* احمد ربنا الاكل الى مش عجبك ده فى ناس مش لقينه .
* التهديدات المخيفة شكلا و الكارتونية مضمونا : مثل: هأقطم رقبتك أو هأقطع ايدك أو هأقطع لك لسانك أو هأدبحك دبح .
* قومي سخني الأكل لأخوكي.
* ومن اشهر الجمل الى بتتقال كل يوم بعد الاكل :
انا مش الخدامه اللي اشترهالكوا ابوكوا اللي ياكل في طبق او يشرب في كباية يغسلها ما يركنهاش في الحوض.
واخر حاجه عايز اقولها
*قوم كدا شوف ابن عمك اللى كان بيذاكر على لمبة جاز مش زيك يا فاشل.
*والتانى اللى كان بيذاكر على عامود النور الي في الشارع و نجح وخد الدكتوراه وسافر أمريكا ( ٌٌقال يعنى كان بيعرف يركز والناس ماشيه حوليه فى الشارع )
منقول
الأربعاء أبريل 07, 2010 12:32 am
